Sagan
Ég er Hafnfirðingur í húð og hár, bý í Hafnarfirði og hef gert mest allt mitt líf, þó með stoppi á Dalvík 2000 - 2006, með fjölskyldunni minni, á þrjá stráka sem halda mér á tánum jafn mikið og vinnan gerir.
Áhuginn á tölvum og tækni byrjaði snemma og hefur fylgt mér alla tíð síðan. Frá 2013 hef ég starfað í upplýsingatækni, fyrst í almennri kerfis- og notandaþjónustu og síðan smám saman færst yfir í sérhæfðari verkefni, netkerfi, hýsingarumhverfi og stærri innleiðingar á lausnum eins og Nutanix og Cohesity. Það sem heldur mér við efnið er fjölbreytileikinn; engir tveir dagar eru eins, og ég kann vel við að leysa flókin vandamál og einfalda þau fyrir aðra.
Sem alhliða kerfisstjóri hef ég byggt upp breiða þekkingu sem nær yfir flesta þætti upplýsingatækniinnviða, þar á meðal netkerfi. Ég hef víðtæka reynslu af hönnun, innleiðingu og rekstri á bæði víð- og staðarnetum, og hef meðal annars séð um umfangsmikil útskipti og uppsetningar á Fortinet búnaði fyrir stærri viðskiptavini. Þessi breidd þýðir að ég get tekið heildstætt á verkefnum, frá netkerfi og hýsingu yfir í notandaþjónustu, án þess að þurfa að vísa málum áfram til annarra sérfræðinga. Að því sögðu þekki ég mín takmörk og óttast ekki að leita til annarra sé þess þörf.
Ég legg mig fram um að vera traustur tengiliður fyrir þá sem ég vinn með, hvort sem það er viðskiptavinur sem þarf skýr svör eða samstarfsfólk sem þarf einhvern til að taka af skarið. Þjónustulund og að halda hlutum gangandi snurðulaust skiptir mig meira máli en að eiga síðasta orðið um tæknilegar útfærslur.
Utan vinnu er ég mikið fyrir tölvuleiki, skotveiði, hreyfingu og að fikta í hinu og þessu, sem á sennilega stóran þátt í því af hverju tæknin heillaði mig til að byrja með.